New Events

محکمہ یوتھ افیئرز خیبر کے زیر اہتمام اور ضلعی انتظامیہ کے تعاون سے نوجوانوں کے لیے میڈیکل بلنگ کا شارٹ کورس کامیابی کے ساتھ مکمل کر لیا گیا۔ یہ تربیتی کورس جمرود اور لنڈی کوتل میں منعقد کیا گیا، جس کا بنیادی مقصد نوجوانوں کو جدید تقاضوں سے ہم آہنگ، روزگار دوست اور مارکیٹ میں

کارآمد مہارتیں فراہم کرنا تھا۔

اس تربیتی پروگرام میں ضلع خیبر کے نوجوانوں نے بھرپور دلچسپی کا مظاہرہ کیا، جہاں مجموعی طور پر 90 طلبہ و طالبات نے میڈیکل بلنگ کی تربیت کامیابی کے ساتھ مکمل کی۔ کورس کے دوران شرکاء کو میڈیکل بلنگ کے بنیادی تصورات، عملی تربیت، جدید سسٹمز کے استعمال اور صحت کے شعبے میں موجود روزگار کے مواقع سے متعلق جامع رہنمائی فراہم کی گئی۔

محکمہ یوتھ افیئرز خیبر کے مطابق اس اقدام کا مقصد نوجوانوں کو بااختیار بنانا، ان میں پیشہ ورانہ صلاحیتوں کو فروغ دینا اور صحت کے شعبے کے لیے ہنر مند افرادی قوت تیار کرنا ہے تاکہ نوجوان نہ صرف مقامی بلکہ قومی سطح پر بھی باعزت روزگار حاصل کر سکیں۔

میڈیکل بلنگ شارٹ کورس کی تکمیل پر نوجوانوں میں اسناد کی تقسیم کی تقریبات اسسٹنٹ کمشنر جمرود کے دفتر اور اسسٹنٹ کمشنر لنڈی کوتل کے دفتر میں منعقد ہوئیں۔ اس موقع پر اسسٹنٹ کمشنر جمرود خیام ناصر، ایڈیشنل اسسٹنٹ کمشنر جمرود نسیم اللہ شاہ اور ڈسٹرکٹ یوتھ افیئرز خیبر کے آفیسر ساجد آفریدی نے شرکت کی۔

تقریب سے خطاب کرتے ہوئے مقررین نے کہا کہ نوجوان کسی بھی ملک، علاقے اور معاشرے کی ترقی و خوشحالی میں کلیدی کردار ادا کرتے ہیں۔ انہوں نے اس بات پر زور دیا کہ بدلتے ہوئے دور کے تقاضوں کے مطابق نوجوانوں کو جدید ہنر اور عملی مہارتیں سکھانا ناگزیر ہے تاکہ وہ ملک و قوم کی ترقی میں اپنا مؤثر اور

فعال کردار ادا کر سکیں۔

مقررین نے محکمہ یوتھ افیئرز خیبر کے اقدامات کو سراہتے ہوئے امید ظاہر کی کہ اس نوعیت کے تربیتی پروگرام مستقبل میں بھی جاری رہیں گے، جو نوجوانوں کو خود کفیل بنانے اور معاشی استحکام کی جانب گامزن کرنے میں معاون ثابت ہوں گے۔