New Events

ضلع یوتھ آفس خیبر اور ضلعی انتظامیہ خیبر کے اشتراک سے لنڈی کوتل میں سیڈ بال منتشری مہم کا انعقاد

لنڈی کوتل: ڈائریکٹوریٹ آف یوتھ افیئرز، حکومت خیبر پختونخوا کے زیر انتظام ضلع یوتھ آفس خیبر اور ضلعی انتظامیہ خیبر کے باہمی اشتراک سے لنڈی کوتل کے پہاڑی علاقوں میں ماحولیات کے تحفظ اور شجرکاری کے فروغ کے لیے **سیڈ بال منتشری مہم** کامیابی سے منعقد کی گئی۔

مہم میں شینواری ماڈل کالج ، تاتارا ماڈل کالج اور لیڈز ماڈل کالج لنڈیکوتل کے 28 طلبہ نے بھرپور جوش و جذبے کے ساتھ شرکت کی۔ شرکاء نے لنڈی کوتل کے مختلف پہاڑی مقامات پر بڑی تعداد میں سیڈ بالز منتشر کیے تاکہ بارشوں کے موسم میں قدرتی طور پر درختوں کی افزائش کو فروغ دیا جا سکے، بنجر علاقوں کو سرسبز بنانے میں مدد ملے اور ماحولیاتی تحفظ کو تقویت حاصل ہو۔

اس موقع پر شرکاء کو شجرکاری، ماحولیاتی تحفظ، موسمیاتی تبدیلی کے اثرات اور قدرتی وسائل کے پائیدار استعمال کے حوالے سے آگاہی بھی فراہم کی گئی۔ طلبہ نے اس عزم کا اظہار کیا کہ وہ مستقبل میں بھی ماحول دوست اور رضاکارانہ سرگرمیوں میں بھرپور کردار ادا کریں گے۔

ضلع یوتھ آفس خیبر اور ضلعی انتظامیہ خیبر کے نمائندوں نے اس موقع پر کہا کہ نوجوانوں کو عملی ماحولیاتی سرگرمیوں میں شریک کرنا وقت کی اہم ضرورت ہے۔ ایسے اقدامات نہ صرف نوجوانوں میں سماجی ذمہ داری، رضاکارانہ خدمات اور قیادت کی صلاحیتوں کو فروغ دیتے ہیں بلکہ ایک سرسبز، محفوظ اور پائیدار ماحول کے قیام میں بھی اہم کردار ادا کرتے ہیں۔

آخر میں ضلع یوتھ آفس خیبر اور ضلعی انتظامیہ خیبر نے تینوں تعلیمی اداروں کی انتظامیہ، اساتذہ اور طلبہ کے تعاون کو سراہتے ہوئے اس عزم کا اعادہ کیا کہ نوجوانوں کی مثبت کردار سازی، ماحولیاتی تحفظ اور پائیدار ترقی کے فروغ کے لیے مستقبل میں بھی اس نوعیت کی مشترکہ سرگرمیوں کا انعقاد جاری رکھا جائے گا۔